تاریخ وفات پر ہرسال دعوت كا اهتمام

0

سوال:

کسی کے مرنے کی تاریخ پر ہرسال دعوت کی جائے تو کیا یہ جائز ہے ۔ اور اللہ تعالی کہاں ہے ؟ (شاہد – شویخ، كويت)

جواب:

کسی کے مرنے کی تاریخ پر ہرسال دعوت دے کر کھلانا پیارے نبی صلى الله عليه وسلم اور آپ کے پیارے اصحاب رضوان الله عليهم اجمعين سے ثابت نہیں ۔ اللہ کے نبی صلى الله عليه وسلم کے کتنے رشتے دار آپ کی زندگی میں فوت پا گئے لیکن آپ نے ان کا یوم وفات نہیں منایا ۔

لَّقَدْ كَانَ لَكُمْ فِي رَسُولِ اللَّـهِ أُسْوَةٌ حَسَنَةٌ لِّمَن كَانَ يَرْجُو اللَّـهَ وَالْيَوْمَ الْآخِرَ وَذَكَرَاللَّـهَ كَثِيرًا ﴿الأحزاب:21 ﴾

"در حقیقت تم لوگوں کے لیے اللہ کے رسولؐ میں ایک بہترین نمونہ ہے ، ہر اُس شخص کے لیے جو اللہ اور یوم آخر کا امیدوار ہو اور کثرت سے اللہ کو یاد کرے "

 اگر ہم وہ کام کریں جسے پیارے حبیب نے نہیں کیا یا کرنے کا حکم نہیں دیا تو وہ مردود ہوگا ۔ اللہ کے رسول  صلى الله عليه وسلم نے فرمایا :

من أحدث فی أمرنا ھذا ما لیس منہ فھو رد. (بخاری ومسلم )

"جس نے دین میں کوئی نئی چیز ایجاد کی جو دین میں سے نہیں ہے تو وہ مردود ہے" ۔ اور صحیح مسلم کی روایت میں ہے :

من عمل عملا لیس علیہ أمرنا فھو رد۔ (مسلم)

"جس نے کوئی ایسا کام کیا جوہماری شریعت کے مطابق نہیں وہ مردود ہے" ۔

 ہاں مردے کو ثواب پہنچانا ہے تو ان کے لیے صدقہ وخیرات جتنا چاہیں کریں لیکن کوئی دن یا کوئی وقت خاص کرکے نہیں ۔ اسی طرح زیادہ سے زیادہ ان کے لیے دعائیں بھی کریں ۔