شہناز باجی وفات پا گئیں

شیخ ارشد فہیم الدین مدنی کی خالہ زاد بہن، عبداللہ بھائی کی اہلیہ اور ہماری پڑوسن شہناز باجی لیور فیل ہوجانے کے باعث آج بروز جمعہ دو بجے رات میں اس دارفانی سے رخصت ہوگئیں، انا للہ وانا الیہ راجعون۔

موصوفہ کو ایک عرصہ سے لیور کا عارضہ لاحق تھا، پچھلے سال ان کا بہت خطرناک اکسیڈنٹ ہوگیا تھا جن دنوں میں بھی صحت کی خرابی سے جوجھ رہا تھا، الحمدللہ چند مہینوں کے مسلسل علاج اور ورزش سے ٹوٹے اعضاء بحال ہوگئے تھے، لیکن اس بیچ لیور کی دوا بدستور جاری نہ رہ سکی جس کے باعث بیماری بڑھتی گئی، پٹنہ لے جایا گیا ڈاکٹرس نے تشخیص کے بعد مایوسی ظاہر کی بالآخر اہل خانہ انہیں لے کر گھر واپس آگئے تھے۔

موصوفہ بڑی نیک، پارسا اور صوم و صلاة کی پابند تھیں، شادی کے بعد مالی مشکلات سامنے آئے لیکن ہمت نہ ہاری اور معمولی رقم پر بچیوں کو ٹیوشن کرانا شروع کیا، سالوں تک کراتی رہی بالآخر قسمت نے ساتھ دیا اور سرکاری ٹیچر کے طور پر بحالی ہوگئی اور گھر میں خوشحالی آگئی۔

ان کی تعلیم ننیہال اموا شیخ ٹولی میں ہوئی تھی، میری ہمیشیرہ رحمت باجی ان کی ہم سبق تھیں، جن کا سایہ ہم سے چودہ سال قبل اٹھ گیا، (اللہ ان کی مغفرت فرمائے) ہمشیرہ کی وفات کے بعد سے جب بھی میں شہناز باجی کو دیکھتا اپنی ہمشیرہ کی یاد تازہ ہو جاتی تھی، نہایت، خلیق اور ملنسار خاتون تھی، ان سے مل کر ہر ایک کو بہت اپنائیت کا احساس ہوتا تھا، ہمارے گھر کے بالکل سامنے ان کا گھر ہے، ہم سے ان کے اچھے مراسم تھے، ہر دکھ درد میں برابر کی شریک رہتی تھیں، گو کہ ان کے پسماندگان میں دو بیٹا ہے اور ایک شوہر لیکن ان کے گھر کے ہر فرد سے ہمارا ایسا تعلق تھا کہ ہم خود کو لواحقین میں شمار کررہے ہیں اور یہ دل خراش خبر سن کر جذبات سے بے قابو ہوتے جارہے ہیں۔ لیکن موت سے کس کو رستگاری ہے ، آج وہ کل ہماری باری ہے۔

لہذا ہم پسماندگان سے کہیں گے: اللہ آپ کے اجر وثواب میں اضافہ فرمائے، صبر سے کام لیں، اللہ کے فیصلے سے راضی رہیں، یہ دنیا کی ریت ہے، یہاں کوئی ہمیشہ رہنے نہیں آیا، شرعی طریقے سے ان کی تدفین کریں اور ایصال ثواب کا جائز طریقہ اختیار کریں۔

اللہ پاک موصوفہ کی مغفرت فرمائے، ان کی قبر کو نور سے بھر دے اور انہیں جنت الفردوس میں جگہ نصیب فرمائے۔ آمین

مکمل تحریر >>

بچوں کے ساتھ اللہ کے رسول ﷺ کا معاملہ کیسا ہوتا تھا ؟

اللہ کے رسول ﷺ ساری مخلوق کے لیے رحمت بناکر بھیجے گیے تھے، آپ کا معاملہ سماج کے ہر طبقہ کے ساتھ نہایت عمدہ ہوتا تھا، آپ افضل رسول تھے، آپ بہادر جرنیل تھے،  آپ بہترین شوہر تھے، آپ شفیق باپ تھے، یہاں تک کہ بچوں کے ساتھ بھی آپ کا معاملہ شفقت و رحمت اور مہربانی پر مبنی ہوتا تھا۔
آج  ہم آپ ﷺ کی سیرت طیبہ کے دریچے سے بچوں کے ساتھ آپ کے کریمانہ اخلاق کے چند نمونے پیش کر یں گے جن سے بچوں کے ساتھ آپ کی شفقت اور محبت کا بآسانی اندازہ لگایا جا سکتا ہے۔
اپنے بیٹے ابراہیم کے ساتھ:
جب آپ ﷺ کے گھر ابراہیم کی پیدائش  ہوئی اور ابو رافع نے آکر آپ کو اس کی خبر دی تو آپ ﷺ نے خوشی سے اسے ایک غلام عنایت فرمایا۔ (الطبقات الكبرى  1 / 135 ) جب صبح ہوئی تو اللہ کے رسول ﷺ نے اپنے گھر آنے والے اس نئے مہمان کی صحابہ کرام کو بشارت دی، چنانچہ آپ ﷺ نے فرمایا:  ولد لي الليلة غلام فسميته باسم أبي إبراهيم (صحيح مسلم  4 / 1807 )   آج کی رات مجھے ایک لڑکا پیدا ہوا ہے میں نے اس کا نام اپنے باپ کے نام پر ابراہیم رکھا ہے۔
انس رضی اللہ عنہ کا بیان ہے کہ ہم رسول اللہ ﷺ کےساتھ ابوسیف کے گھر گئے جو لوہاری کا پیشہ اختیار کرتے تھے اور ان کی بیوی ام سیف (عرب کی روایت کے مطابق) ابراہیم کو دودھ پلا رہی تھی، اللہ کے رسول ﷺ نے ابراہیم کو لیا اسے بوسہ دیا اور چوما۔ پھر دوسری مرتبہ ہم آپ کے ساتھ ابراہیم کے پاس گئے یہ وہ وقت تھا کہ حضرت ابراہیم جان کنی کے عالم میں تھے۔ یہ منظر دیکھ کر رحمتِ عالم ﷺ کی آنکھوں سے آنسو جاری ہوگئے۔
اس وقت عبدالرحمن بن عوف رضی اللہ عنہ نے عرض کیا کہ یارسول اﷲ!ﷺکیا  آپ بھی روتے ہیں؟  آپ ﷺنے ارشاد فرمایا کہ اے عوف کے بیٹے!یہ میرا رونا ایک شفقت کا رونا ہے۔ اس کے بعد پھر دوبارہ جب آپ کی مبارک آنکھوں سے آنسو بہنےلگے  تو آپ کی زبان مبارک پریہ کلمات جاری ہوگئے:اِنَّ الْعَیْنَ تَدْمَعُ وَ الْقَلْبَ یَحْزَنُ وَلَا نَقُوْلُ اِلاَّ مَا یَرْضٰی رَبُّنَا وَاِنَّا بِفِرَاقِکَ یَا اِبْرَاہِیْمُ لَمَحْزُوْنُوْنَ‘‘ آنکھ آنسو بہاتی ہے اور دل غمزدہ ہے مگر ہم وہی بات زبان سے نکالتے ہیں جس سے ہمارا رب خوش ہو جائے اور بلاشبہ اے ابراہیم! ہم تمہاری جدائی سے بہت زیادہ غمگین ہیں۔ (رواه البخاری:1303، مسلم :2315).
اور صحیح مسلم کی روایت میں انس رضی اللہ عنہ کہتے ہیں: والله ما رأيت أحدًا كان أرحم بالعيال من رسول الله صلى الله عليه وسلم (رواه مسلم 2316).  اللہ کی قسم! میں نے اللہ کے رسول ﷺ سے زیادہ اپنے اہل وعیال پر رحم وشفقت کرنے والا کسی اور کو نہیں دیکھا۔
اپنے نواسے حسن اور حسین رضی اللہ عنہما کے ساتھ

ام سلمہ رضی اللہ عنہا بیان کرتی ہیں کہ کہ ایک دن حسن یا حسین رضی اللہ عنہما  آپ کے پیٹ پر بیٹھے ہوئے تھے، انہوں نے آپ کے شکم مبارک پر پیشاب کرنا شروع کردیا، آپ ﷺ نے فرمایا: لا تزرموا ابنِي أو لا تستعجِلوه فتركه حتىقضى بولَه فدعا بماءٍ فصبَّه عليه (مجمع الزوائد: 1/290)

 میرے بیٹے کو پیشاب کرلینے دو۔ جلدی مت کرو، چنانچہ آپ نے اسے چھوڑ دیا حتی کہ پیشاب سے فارغ ہوگیا، پھر اس کے بعد پانی منگوایا اوراس پر چھینٹ مار دی ۔ 

سیدنا ابوہریرہ رضی الله عنہ سے روایت ہے کہ رسول الله صلی اللہ علیہ وسلم حسن بن علی رضی الله عنہما کے لیے اپنی زبان باہر نکالتے، جب بچہ زبان کی سرخی دیکھتا تو وہ خوش ہو جاتا ۔ (السلسلة الصحيحة 1 / 110)

حضرت ابو ہریرہ رضی اللہ عنہ کا بیان ہے کہ رسول اللہ صلی اللہ علیہ وسلم اپنے گھر سے نکل کر ہمارے پاس تشریف لائے۔ آپ کے ساتھ حضرت حسن اور حضرت حسین رضی اللہ عنہما بھی تھے، ایک آپ صلی اللہ علیہ وسلم کے ایک کندھے پر اور دوسرے آپ صلی اللہ علیہ وسلم کے دوسرے کندھے پر تھے۔ اور آپ صلی اللہ علیہ وسلم کبھی اِن سے پیار کرتے اور کبھی اُن سے۔ چنانچہ ایک شخص نے آپ صلی اللہ علیہ وسلم سے پوچھا : اے اللہ کے رسول ! کیا آپ کو ان سے محبت ہے ؟ آپ صلی اللہ علیہ وسلم نے فرمایا مَن اَحَبَّہُمَا فَقَد اَحَبَّنِی ، وَمَن اَبغَضَہُمَا فَقَد اَبغَضَنِی (الصحيحة: 2895)  جس نے ان سے محبت کی اس نے مجھ سے محبت کی ۔ اور جس نے ان سے بغض رکھا اس نے مجھ سے بغض رکھا ۔ 

ایک موقع سے آپ نے فرمایا :  ہُمَا رَیحَانَتَایَ مِنَ الدُّنیَا۔  بے شک حسن اور حسین رضی اللہ عنہما  دنیا میں میرے دوپھول ہیں۔ ( صحیح بخاری: 5994)

سنن ابو داود کی روایت ہے حضرت بریدہ رضی اللہ عنہ  کا بیان ہے کہ رسول اللہ صلی اللہ علیہ وسلم خطبہ ارشاد فرما رہے تھے کہ اس دوران حضرت حسن اور حضرت حسین رضی اللہ عنہما نمودار ہوئے ، انہوں نے سرخ رنگ کی قمیصیں پہنی ہوئی تھیں اور وہ ان میں بار بار پھسل رہے تھے ۔ چنانچہ رسول اللہ صلی اللہ علیہ وسلم منبر سے نیچے اترے، اپنا خطبہ روک دیا، انہیں اٹھایا اور اپنی گود میں بٹھا لیا ۔پھر آپ صلی اللہ علیہ وسلم انہیں اٹھائے ہوئے منبر پر چڑھے ۔ اس کے بعد فرمایا : اللہ تعالی نے سچ فرمایا ہے کہ

إِنَّمَا أَمْوَالُكُمْ وَأَوْلَادُكُمْ فِتْنَةٌ بے شک تمھارے اموال اور تمھاری اولاد آزمائش ہیں ۔“  میں نے انہیں دیکھا تو مجھ سے رہا نہ جا سکا ۔  پھر آپ صلی اللہ علیہ وسلم نے اپنا خطبہ مکمل فرمایا ۔ ( سنن ابوداؤد: 1109) عبداللہ بن شداد اپنے باپ سے بیان کرتے ہیں کہ ایک مرتبہ اللہ کے رسول صلی اللہ علیہ وسلم ظہر یا عصر کی نماز کے لیے تشریف لائے، آپ نے حسن یا حسین رضی اللہ عنھما کو اٹھا رکھا تھا، آپ آگے بڑھے، انہیں انہیں سامنے رکھ دیا اور اور نماز پڑھانے لگے، نماز کے بیچ آپ نے بہت لمبا سجدہ کیا، میں نے سر اٹھایا تو دیکھا کہ بچہ آپ کی پشت مبارک پر ہے، اور آپ سجدے کی حالت میں ہیں،  میں دوبارہ سجدے میں لوٹ گیا، جب رسول ﷺ نماز سے فارغ ہوئے تو لوگوں نے کہا: اے اللہ کے رسول! آپ نے اثنائے نماز بہت لمبا سجدہ کیا۔ حتی کہ ہمیں اندیشہ ہوا کہ کوئی  معاملہ تو پیش نہیں آگیا  یا  آپ پر وحی  تو نازل نہیں ہو رہی ہے؟  آپ نے فرمایا: ایسا کچھ بھی نہیں ہوا، بس میرا نواسا میری گردن پر  بیٹھ گیا تھا، میں نےاسے اپنی ضرورت پوری کرنے سے پہلے ہٹانا مناسب نہیں سمجھا ۔ (سنن النسائی: 1140).

اپنی نواسی امامہ بنت ابوالعاص کے ساتھ :

اللہ کے رسول ﷺ اپنی نواسی  امامہ رضی اللہ عنہا پر جو زینب کی بیٹی تھیں بہت شفقت فرماتے تھے،  بسااوقات اسے لے کر مسجد چلے جاتے، اسے اٹھا کر آپ نماز پڑھتے تھے، جب سجدہ کرتے تو زمین پر بٹھا دیتےاور کھڑے ہوتے تواپنے کندھے پر  اٹھا لیتے تھے۔ (صحیح البخاری:516، صحیح مسلم:542).

صحابہ کے بچوں اور بچیوں کے ساتھ :

بلکہ صحابہ کے بچوں اور بچیوں کے ساتھ بھی آپ بڑی شفقت اور پیار کا معاملہ فرماتے تھے۔ جب صحابہ کے بچے پیدا ہوتے تو وہ آپ کی خدمت میں لاتے تھے، آپ اسے گود میں لیتے، اسے بوسہ دیتے اور اس کے لیے برکت کی دعائیں فرماتے تھے۔ صحیح البخاری کی روایت ہے حضرت ابوموسی اشعری رضی اللہ عنہ کا بیان ہے کہ مجھے ایک لڑکا ہوا، میں اسے لے کر اللہ کے رسول ﷺ کی خدمت میں آیا، چنانچہ آپ نے اس کا نام ابراہیم رکھا، کھجور کو چباکر اس کی گھٹی کی، اور اس کے لیے برکت کی دعا فرمائی، پھر میرے حوالے کردیا۔

ام خالد کے ساتھ:

 ام خالد جلیل القدر صحابی خالد بن سعید بن العاص کی بیٹی ہیں، ان کی ولادت سرزمین حبشہ میں ہوئی، جب وہاں سے حضرت خالد رضی اللہ عنہ لوٹ کر آئے توایک دن  آپ کی خدمت میں تشریف لائے،  اپنے ساتھ اپنی بیٹی ام خالد کو بھی لے کرآئے تھے۔ اس بچی  ام خالد کے ساتھ اللہ کے رسول ﷺ نے جومعاملہ کیا اسے خود انہوں نے بیان کیا ہےچنانچہ صحیح البخاری کی روایت ہے ۔ وہ خود فرماتی ہیں: میں اپنے باپ کے ساتھ اللہ کے رسول ﷺ کے پاس آئی، میں نے زرد رنگ کی قمیص زیب تن کر رکھی تھی، آپ ﷺ نے فرمایا: " سِنَهْ سِنَهْ " (حدیث کے راوی) عبداللہ  کہتے ہیں کہ حبشی زبان میں خوبصورت کو " سِنَهْ سِنَهْ "  کہاجاتا ہے۔ وہ کہتی ہیں کہ میں مہر نبوت سے کھیلنے لگی، میرے باپ نے مجھے ڈانٹا، تو اللہ کے رسول ﷺ نے فرمایا: اسے چھوڑ دو، پھر آپ ﷺ نے فرمایا: " أَبْلِي وَأَخْلِقي، ثُمَّ أَبْلِي وأَخْلِقي، ثُمَّ أَبْلِي وَأَخْلِقي ". یہ کپڑا تمہارے بدن پر لمبی مدت تک رہے اور تمہیں لمبی زندگی ملے۔ یہ بات آپ نے تین مرتبہ فرمایا۔ راوی کا بیان ہے کہ وہ ایک عرصہ تک باحیات رہیں۔ (صحیح البخاری: 3071)

جابر بن سمرہ رضی اللہ عنہ کے ساتھ: 
صحیح مسلم کی روایت ہے جابر بن سمرہ رضی اللہ عنہ بیان کرتے ہیں کہ : جابر بن سمرہ رضی اللہ عنہ بیان کرتے ہیں کہ :  صليتُ مع رسولِ اللهِ صلَّى اللهُ عليهِ وسلَّمَ صلاةَ الأولى . ثم خرج إلى أهلِه وخرجتُ معَه . فاستقبلَه ولدانٌ . فجعل يمسحُ خدَّيْ أحدهم واحدًا واحدًا . قال : وأما أنا فمسح خدِّي . قال فوجدتُ لِيَدِه بردًا أو ريحًا كأنما أخرجها من جؤنةِ عطارٍ (صحيح مسلم:  2329)

میں نےرسول اللہ ﷺ کے ساتھ  ظہرکی نماز پڑھی، پھر آپ  اپنے گھر تشریف لے جانے لگےتو میں بھی آپ کے ساتھ نکلا، چند بچے آپ کے سامنے آئے، آپ نے ہر بچے کے رخسار پر ہاتھ پھیرا،  میرے رخسار پر بھی ہاتھ پھیرا، میں نے آپ کے ہاتھ میں ایسی ٹھنڈک اور خوشبو محسوس کی گویا عطار کے ڈبے سے آپ نے ہاتھ نکالا ہو۔

ابو عمیر رضی اللہ عنہ کے ساتھ:

بسااوقات آپ ﷺ بچوں سے کھیلتے اور ان سے ہنسی مذاق کرتے تھے: انس رضی اللہ عنہ کے ایک ماں شریک بھائی تھے، ابو عمیر رضی اللہ عنہ، وہ چھوٹے بچے تھے، ان کے پاس ایک پرندہ تھا، جس سے وہ کھیلا کرتے تھے،اچانک وہ پرندہ مر گیا،  انس رضی اللہ عنہ کا بیان ہے کہ جب بھی آپ ﷺ ہمارے گھر تشریف لاتے تو فرماتے: «يا أبا عمير، ما فعل النُغير (رواه البخاری:6203، ومسلم: 2150). اے ابو عمیر! تیرے نغیر کا کیا ہوا؟ 

محمود بن الربیع  رضی اللہ عنہ  کے ساتھ:
کبھی کبھار اللہ کے رسول ﷺ بچوں سے  اپنے پیار کا اظہار کرنے کے لیے ان کے منہ پر کلی پھینکتے ۔صحیح البخاری کی روایت ہے ایک مرتبہ اللہ کے رسول ﷺ نے اپنے منہ میں پانی ڈالا اور اپنے منہ سے پانچ سال کے بچے کے منہ پر کلی پھینکا، ایسا آپ نے پیار اور محبت کے اظہار کے لیے کیا۔ یہ صحابی محمود بن الربیع رضی اللہ عنہ ہیں، چنانچہ وہ بڑے ہونے کے بعد لوگوں سے کہا کرتے تھے: عَقَلْتُ من النبيِّ صلَّى اللهُ عليهِ وسلَّم مَجَّةً مَجَّها في وجْهِي، وأنَا ابنُ خمسِ سِنِينَ، من دَلْوٍ .( صحيح البخاري: 77) مجھے اچھی طرح سمجھ  ہے کہ اللہ کے نبی ﷺ نے برتن سے پانی لے کر میرے چہرے پر کلی پھینکا تھا جبکہ میں اس وقت پانچ سال کا تھا۔  

بچے کو اس کا حق دیا:

اللہ کے رسول ﷺ کی بچوں پر ایسی شفقت تھی کہ آپ یہ بھی گوارہ نہیں کرتے تھے کہ بچوں کا حق مار کر بڑوں کا خیال کرتے ہوئے ان کو  دے دیا جائے۔ایک مرتبہ کا واقعہ ہے ، سہل بن سعد رضی اللہ عنہ واقعہ کے راوی ہیں ،  اللہ کے رسول ﷺ کے پاس پینے کی کوئی چیز پیش کی گئی۔ آپ نے اس سے نوش فرمایا،  آپ کے دائیں جانب ایک بچہ تھا، اورآٓپ کے بائیں جانب عمر رسیدہ افرادتھے،  آپ ﷺ نے اس بچے سے فرمایا: کیا تم اجازت دیتے ہوکہ میں ان کو (پہلے)  دوں؟ بچے نے کہا: اللہ کی قسم میں آپ کی طرف سے ملے حصے پر کسی اور کو ترجیح نہیں دے سکتا۔ چنانچہ آپ ﷺ نے اس کے ہاتھ میں رکھ دیا۔ (صحیح البخاری:2605، صحیح مسلم:2030). اس حدیث میں اس بات کا اشارہ پایا جاتا ہے کہ اللہ کے رسولﷺ بچوں کا اہتمام کرتے تھے، انہیں ان کا حق دینے کی تاکید کرتے تھےاور اپنا حق حاصل کرنے کے لیے ان میں  جرأت کا جذبہ پیدا کرتے تھے۔

 یہودی لڑکے  کے ساتھ : 

انس رضی اللہ عنہ بیان کرتے ہیں کہ ایک یہودی لڑکا آپ ﷺ کی خدمت  کرتا تھا، ایک مرتبہ  وہ بیمار ہوگیا، آپ اس کی تیمارداری کے لیے اس کے گھر تشریف لے گئے، آپ اس کے سر کے پاس بیٹھے، اور فرمایا: اسلام قبول کرلو۔ لڑکا اپنے باپ کی طرف دیکھنے لگا جو اس کے پاس تھا، باپ نے کہا: ابوالقاسم کی بات مان لو۔ چنانچہ اس نے اسلام قبول کرلیا۔اللہ کے نبی ﷺ وہاں سے نکلے تو آپ فرما رہے تھے: «الحمد لله الذي أنقذه من النار» (صحیح البخاری:1356). اللہ کا شکر ہے کہ اس نے میرے ذریعہ اسے جہنم سے بچا لیا۔

 بچیوں کی اہمیت:

زمانہ جاہلیت میں لوگ بچیوں کی پیدائش کو عار سمجھتے تھے، لیکن نبی ﷺ نے بچیوں کو ان کا حق دیا، ان کا احترام کیا، اور ان کی تربیت وتعلیم پر خصوصی انعامات کی بشارت سنائی  بلکہ ان کے حسن تربیت کو جنت میں داخلے کا موجب گردانا۔آپ ﷺ نے فرمایا:

«من عال جاريتين حتى تبلغا، جاء يوم القيامة أنا وهو - وضم أصابعه-» (صحیح مسلم:2631). 

جس نے دو بچیوں کو بلوغت تک پوسا پالا، جب وہ قیامت کے دن آئے گا تو میں اور وہ یوں ہوں گا۔ پھر آپ نے اپنی انگلیوں کو ملایا۔

سیدہ عائشہ رضی اللہ عنہا بیان کرتی ہیں کہ میرے پاس ایک عورت آئی، اس کے ساتھ دو بیٹیاں تھیں، مجھ سے کچھ مانگا، میرے پاس صرف ایک کھجور تھی، میں نے اسے دے دیا، اس نے اسے آدھا آدھا کرکے دونوں بیٹیوں میں بانٹ دیا، اور خود نہ کھائی، پھر کھڑی ہوئی اور چلی گئی، اللہ کے رسول ﷺ جب تشریف لائے تو میں نے ان سے اس کا ذکر کیا، آپ ﷺ نے فرمایا:

من ابتلي من هذه البنات بشيء فأحسن إليهن كن له ستراً من النار  ( صحیح البخاری: 1418، صحیح مسلم: 2629)

جسے ان بیٹیوں کی وجہ سے کسی طریقے سے آزمایا جائے اور وہ ان کے ساتھ اچھا معاملہ کرے تو یہ ( کل قیامت کے دن) جہنم سے پردہ بنیں گی۔

مکمل تحریر >>

فضیلۃ الشیخ ابو بکر جابر الجزائزی وفات پا گئے

📜مسجد نبوی کے استاذ فضیلۃ الشیخ ابو بکر جابر الجزائزی

 آج صبح 97 سال کی عمر میں اس دار فانی سے کوچ کر گئے۔ انا للہ و انا الیہ راجعون۔

✍ آپ کا تعلق الجزائز سے تھا، حج کی ادائیگی کے لیے سر زمین حجاز کا سفر کیا تو مدینہ میں سکونت اختیار کر لی اور وہیں کے ہوکر رہ گئے، آپ ساٹھ سال سے زائد عرصہ تک مسجد نبوی میں مسلسل درس دیتے رہے، آپ نے خدمت دین کے لیے اپنی پوری زندگی وقف کر دی تھی، آپ مسجد نبوی میں ہی پنجوقتہ نمازیں ادا کرتے تھے، مدینہ یونیورسٹی کی تاسیس میں آپ کا نمایاں رول رہا اور بیس سال تک اس کے استاد رہے۔ 

✍آپ بڑے نیک، پارسا اور تقوی شعار عالم دین تھے، سادگی اور تواضع کے پیکر تھے، سنت کے شیدائی اور دین کے سپاہی تھے۔ 

✍ آپ کے پاس 9 بیٹیاں تھیں اور ایک فرزند ڈاکٹر عبدالرحمن الجزائری ہیں جن سے راقم سطور کو مدینہ یونیورسٹی میں تلمذ کا شرف حاصل ہے۔ 

✍آپ نے سو سے زائد کتابیں تالیف فرمائیں جن میں منھاج المسلم ایسر التفاسیر اور ھذا الحبیب یا محب قابل ذکر ہیں۔ ان میں اول الذکر کتاب اردو داں حلقے میں بھی کافی شہر ت رکھتی ہے جس کا اردو ترجمہ دارالسلام نے چھاپا ہے۔ 

✍اللہ موصوف کی بال بال مغفرت فرمائے، ان کی قبر کو نور سے بھر دے، انہیں جنت الفردوس میں جگہ نصیب فرمائے اور پسماندگان کو صبر جمیل کی توفیق بخشے۔ آمین۔

✍ صفات عالم تیمی

مکمل تحریر >>

استاد الاساتذہ شیخ عبدالسلام مدنی اللہ کو پیارے ھوگئے

 آسماں تیری لحد پر شبنم افشانی کرے 

بڑے ھی رنج وغم کے ساتھ یہ اطلاع دی جارہی ھے کہ جماعت اھل حدیث کی بزرگ ومایہ ناز شخصیت استاد الاساتذہ اور برسوں جامعہ سلفیہ بنارس میں تعلیم ودعوت کے میدان میں بیش بھا خدمات انجام دینے والے ھم سب کے استادشیخ عبدالسلام مدنی ٹکریا ضلع سدھارتھ نگر ایک طویل علالت کے بعد آج بتاریخ 16 جولائی 2018 بروز سوموار شام 5:30 بجے کے قریب عمر کی 74 بھاریں گزار کر اللہ کو پیارے ھوگئے، انا للہ وانا الیہ راجعون اللھم اغفر لہ وارحمہ والھم ذویہ الصبر والسلوان 

موصوف اپنے آبائی وطن ٹکریا نزد ڈمریاگنج ضلع بستی (حال سدھارتھ نگر ) میں 7فروری 1944ء کو پیدا ھوئے، مکتب کی تعلیم کا آغاز گاوں ٹکریا کے مدرسہ مفتاح العلوم میں اور1952ءتا 1960ءدرجہ دوم سے لیکر عربی درجات مشکاۃ جلد 1 تک کی تعلیم جامعہ سراج العلوم بونڈیہار میں ھوئی ،1960 ء میں جامعہ رحمانیہ بنارس تشریف لے گئے اور 1966 ء تک وھاں اساطین اھل علم وفن سے فیضیاب ھوئے اور یھیں سے فراغت ھوئی ۔جامعہ سلفیہ کے تعلیمی افتتاح کے موقع پر شیخ شیبہ الحمد کی سفارش سے مدینہ منورہ میں داخلہ ملا، چنانچہ 1966ء سے لیکے 1970ء تک آپ نے کلیۃ الدعوۃ میں تعلیم حاصل کی اور لیسانس(بی، اے)  کی ڈگری سے سرفراز کئے گئے ۔آپ کے اساتذہ میں مولانا نذیر احمد املوی، شیخ محمد اقبال رحمانی، شیخ محمد عابد رحمانی، شیخ عبدالوحید رحمانی بنارس، شیخ عبدالغفار حسن رحما نی، شیخ عبدالمحسن العباد، ڈاکٹر تقی الدین ھلالی، شیخ محمد امین شنقیطی اور شیخ ابوبکر الجزائری وشیخ ممدوح فخری وغیرہم جیسے اساطین اھل علم اور مشاھیر علماء کے نام شامل ھیں ۔مدینہ منورہ سے فراغت کے بعد 10 دسمبر 1970ء کو جماعت کی مرکزی درسگاہ جامعہ سلفیہ بنارس سے بحیثیت مدرس منسلک ھوگئے اور تعلیم وتدریس، دعوت واصلاح سے بھر پور 43 سال کا ایک طویل عرصہ یھیں گزار دیا اور اس مدت میں ھزاروں شاگردان وتلامذہ کو آپ اپنے علم وعمل کے موتی لٹاتے رھے، اور اپنی علمی صلاحیتوں سے ایک بڑی نسل کو فیض پھونچاتے رھے ۔بالخصوص حدیث کی مشھور کتابیں سنن نسائی صحیح مسلم اور صحیح بخاری پڑھاتے رھے،30 جون 2011ء کو تدریس سے سبکدوش ھوکر آپ اپنے وطن چلے آئے، اور یھیں پر رہ کر تصنیف وتالیف اور دعوت وتبلیغ کا فریضہ انجام دیتے رھے۔آپ کی مشھور تصنیفات میں سنن نسائی جلد 2 کی شرح التعلیق المنتقی اور مشکاۃ کی شرح التعلیق الملیح علی مشکاۃ المصابیح اور دروس حدیث نبویہ وغیرہ ھیں ۔آپ نے اپنے پیچھے ایک بیوہ ( جو آپکے ماموں مولانا خلیل رحمانی مرحوم کی صاحبزادی ھیں )اور5 لڑکے اور5 لڑکیاں چھوڑی ھیں ۔بڑے صاحبزادے عبدالحق ایک بڑے طبیب اور ماھرسرجن ھیں اور دوسرے د۔عبدالنور، عبدالباسط، عبدالظاھر، عبدالواسع ھیں ۔اور سب کے سب تعلیم یافتہ اور برسر روزگار ھیں ۔اللہ تعالی سے دعا ھیکہ مرحوم کو کروٹ کروٹ جنت نصیب فرمائے اور پسماندگان، اھل خانہ، تمام تلامذہ اور پوری جماعت کو صبر جمیل کی توفیق عطافرمائے،

اللھم اغفر لہ وارحمہ واسکنہ الفردوس،

 غمزدہ عبدالحکیم عبدالمعبود المدنی، جامعہ رحمانیہ ممبئی ومرکز تاریخ اھل حدیث ممبئی وبڑھنی بازار سدھارتھ نگر، 16/7/2018

مکمل تحریر >>